काठमाडौं । नेपालमा सूचीकरण नभएका सामाजिक सञ्जाललाई निस्क्रिय गर्ने सरकारले निर्णय गरेसँगै सामाजिक सञ्जाल भित्र के–के पर्छन् भन्ने बहस सुरु भएको छ । कतिपयले युट्युव पनि सामाजिक सञ्जाल हो कि होइन, युट्युव पनि बन्द हुन लागेको हो र भनेर प्रश्न गर्न थालेका छन ।

सामाजिक सञ्जालको प्रयोगलाई व्यवस्थित गर्ने निर्देशिका, २०८० ले सामाजिक सञ्जालका र सामाजिक सञ्जालका प्लेटफर्मलाई परिभाषित गरेको छ ।

निर्देशिका अनुसार सामाजिक सञ्जाल भन्नाले सामाजिक सञ्जाल प्लेटफर्मले कम्प्युटर, इन्टनरनेट लगायतका विद्युतीय सञ्चार माध्यमबाट उपलब्ध गराएको सुविधा र विधि अनुरुप कुनै व्यक्ति, समूह वा संस्थालाई एक अर्कासँग अन्तरक्रियात्मक सञ्चार गर्न सक्ने सुविधा तथा प्रयोगकर्ताले निर्माण गरेका विषयवस्तु प्रसार गर्ने सुविधा समेत प्रदान गर्ने समूह, ब्लग, एप लगायतका सञ्जाललाई भनेको छ ।

यस्तै सामाजिक सञ्जाल प्लेटफर्म भन्नाले कुनै व्यक्ति वा संस्थालाई एक अर्कासँग विचार वा सूचनाको आदानप्रदान गर्न सक्ने वा प्रयोगकर्ताले निर्माण गरेका विषयवस्तु प्रसार गर्ने सुविधा समेत प्रदान गर्ने इन्टरनेट वा सूचना प्रविधिमा आधारित फेसबुक, ट्वीटर (एक्स), वाट्सएप, भाइबर पिन्टरेस्ट,म्यासेन्जर, इन्स्टाग्राम, युट्युव, लिंन्कडइन, विच्याट लगायतका सार्वजनिक रुपमा उपलब्ध हुनेगरी सञ्चालनमा ल्याइएकाप्रणालीलाई भनिएको छ ।

यी सामाजिक संजालहरु नेपालमा दर्ता भएका छैनन् । सरकारले आग्रह गर्दा पनि उनिहरु दर्ता हुन आएका छैनन् । फलस्वरुप सरकारले यी सामाजिक संजालहरुलाई नेपालमा बन्द गर्ने निर्णय गरेको हो ।