म्याग्दी । नेकपा एमाले मंगला गाउँपालिका कमिटीको विस्तारित बैठक सोमबार पालिकाको केन्द्र बाबियाचौरमा सम्पन्न भएको छ । आगामी निर्वाचनको तयारी र संगठन सुदृढीकरणका लागि आयोजना गरिएको उक्त बैठकले चुनावी रणनीति निर्माण गर्नुका साथै विभिन्न महत्त्वपूर्ण निर्णयहरू गरेको छ ।

निर्वाचन परिचालन र कार्ययोजना बैठकले आगामी निर्वाचनलाई व्यवस्थित र प्रभावकारी बनाउन पालिका स्तरको निर्वाचन परिचालन कमिटी गठन गरेको छ । बैठकमा निर्वाचन लक्षित कार्ययोजना निर्माण गर्दै पार्टी संगठन सुदृढीकरण, जनसम्पर्क विस्तार र मतदाताहरू माझ प्रभावकारी रूपमा पुग्ने रणनीतिको विषयमा विस्तृत छलफल गरिएको थियो ।

नेतृत्व र सहभागिता गाउँपालिका कमिटीका अध्यक्ष याम बहादुर रोकाको अध्यक्षतामा सम्पन्न बैठकमा नेकपा एमालेकी केन्द्रीय सदस्य नेतृ नरदेवी पुन प्रमुख अतिथिको रूपमा रहनुभएको थियो ।

कार्यक्रममा जिल्ला तहका नेताहरूको बाक्लो उपस्थिति रहेको थियो । बैठकमा नेकपा एमाले म्याग्दीका अध्यक्ष बालकृष्ण सुवेदी, केन्द्रीय सदस्य हरिकृष्ण श्रेष्ठ, उपाध्यक्ष प्रमोद श्रेष्ठ, नेताहरू सतप्रसाद रोका, बलादेवी राई र प्रकाश पौडेल लगायतले आफ्नो धारणा राख्दै संगठनको अवस्था र भावी योजनाबारे प्रकाश पार्नुभएको थियो ।

जनताको भरोसायोग्य शक्ति बनाउने संकल्प वक्ताहरूले नेकपा एमालेलाई जनताको पहिलो रोजाइ र भरोसायोग्य शक्ति बनाउनुपर्नेमा जोड दिएका छन् । संगठन विस्तारलाई वडा र टोल तहसम्म पुर्‍याएर निर्वाचनको तयारीलाई तीव्रता दिनुपर्ने उनीहरूको भनाइ थियो ।

पार्टीका नीति र एजेण्डाहरूलाई आम नागरिकसम्म पुर्‍याउँदै आगामी निर्वाचनमा उत्कृष्ट नतिजा ल्याउने गरी एकजुट भएर लाग्न नेताहरूले कार्यकर्तालाई निर्देशन समेत दिनुभएको छ ।